اسلام آباد: چینی سفیر ‘جیانگ زائی ڈونگ’ نے نائب وزیراعظم و وزیر خارجہ سینیٹر ‘محمد اسحاق ڈار’ سے ملاقات کی، جس میں دوطرفہ تعلقات اور خطے کی تازہ ترین صورتحال پر تفصیلی تبادلہ خیال کیا گیا۔ملاقات کے دوران علاقائی پیش رفت اور اہم سفارتی امور زیر بحث آئے۔
چینی سفیر نے خطے میں امن و استحکام کے فروغ کے لیے پاکستان کی کوششوں، خصوصاً امریکا اور ایران کے درمیان روابط کو آسان بنانے کے اقدامات کو سراہتے ہوئے چین کی مکمل حمایت اور تعریف کا اظہار کیا۔ نائب وزیراعظم و وزیر خارجہ اسحاق ڈار نے پاکستان اور چین کے درمیان "آل ویدر اسٹریٹجک کوآپریٹو پارٹنرشپ” کی اہمیت کو اجاگر کرتے ہوئے کہا کہ دونوں ممالک کے تعلقات وقت کے ساتھ مزید مضبوط ہو رہے ہیں۔
انہوں نے اس عزم کا اعادہ کیا کہ پاکستان اور چین کے درمیان اعلیٰ سطحی روابط اور تعاون کا سلسلہ جاری رکھا جائے گا تاکہ خطے میں امن، استحکام اور ترقی کو فروغ دیا جا سکے۔
