بہاولپور، (گوادر پرو) پاکستان اور چین نے زرعی اور تعلیمی شعبوں میں دوطرفہ تعاون کو مزید وسعت دیتے ہوئے اسلامیہ یونیورسٹی بہاولپور (آئی یو بی) اور چائنیز اکیڈمی آف ایگریکلچر(سی اے اے ایس) کے تحت کام کرنے والے ادارے انسٹی ٹیوٹ آف اربن ایگریکلچر کے درمیان پائیدار اور اربن ایگریکلچر میں تعاون کے فروغ کے لیےمفاہمتی یادداشت (ایم او یو) پر دستخط کر دیے۔
یہ بات منگل کو جاری ہونے والے آئی یو بی کے اعلامیے میں بتائی گئی۔یونیورسٹی کے مطابق یہ معاہدہ چینگدو میں آئی یو بی کے شعبہ زرعی توسیع تعلیم کے ڈاکٹر محمد شہزاد اور انسٹی ٹیوٹ آف اربن ایگریکلچر کے ڈائریکٹر پروفیسر ژانگ دے کوان کے درمیان طے پایا۔اعلامیے کے مطابق مفاہمتی یادداشت کے تحت زرعی سائنس، پودوں کی افزائش، باغبانی، علومِ ارضیات (مٹی)، زرعی توسیع، فوڈ سائنس و ٹیکنالوجی، ماحولیات، ماحولیاتی علوم اور مخلوط کاشت (انٹرکراپنگ) کے شعبوں میں مشترکہ تحقیق اور منصوبہ سازی شامل ہوگی۔
آئی یو بی کے مطابق اس معاہدے میں اساتذہ، محققین، پوسٹ ڈاکٹریٹ فیلوز، پی ایچ ڈی اسکالرز اور انڈرگریجویٹ طلبہ کے لیے تعلیمی تبادلہ پروگرامز بھی شامل ہیں۔یونیورسٹی نے مزید بتایا کہ اس فریم ورک میں لیبارٹریز، کتب خانوں اور دیگر بنیادی ڈھانچے سمیت وسائل کے اشتراک کے ساتھ ساتھ کانفرنسوں، سمپوزیم اور سائنسی اشاعتوں میں تعاون بھی شامل ہوگا۔
