کمیونسٹ پارٹی آف چائنا کی مرکزی کمیٹی کے سیاسی بیورو کے رکن اور چینی وزیرِ خارجہ وانگ ای نے ایرانی وزیرِ خارجہ عباس عراقچی سے ٹیلیفون پر گفتگو کی۔عباس عراقچی نے کہا کہ ایران پُرامن مذاکرات کے ذریعے منطقی اور حقیقت پسندانہ حل کی تلاش جاری رکھنا چاہتا ہے۔
انہوں نے خطے میں کشیدگی کم کرنے کے لیے چین کی مسلسل کوششوں کو سراہتے ہوئے امید ظاہر کی کہ چین امن کے قیام اور جنگ کے خاتمے کے لیے مزید فعال کردار ادا کرے گا۔وانگ ای نے کہا کہ موجودہ صورتحال جنگ اور امن کے درمیان ایک اہم مرحلے میں داخل ہو چکی ہے اور امن کا موقع پیدا ہو رہا ہے۔
چین جنگ بندی اور مذاکرات کے تسلسل کی حمایت کرتا ہے۔ انہوں نے کہا کہ آبنائے ہرمز کے ساحلی ملک کے طور پر ایران کی خودمختاری، سلامتی اور جائز حقوق کا احترام کیا جانا چاہیے، جبکہ بین الاقوامی آبی گزرگاہ کے طور پر آبنائے ہرمز میں جہاز رانی کی آزادی اور سلامتی کو بھی یقینی بنانا ضروری ہے۔
انہوں نے مزید کہا کہ چین صدر شی جن پھنگ کے چار نکاتی مؤقف کی روشنی میں صورتحال کو مزید بہتر بنانے، علاقائی ممالک کے درمیان تعلقات میں بہتری لانے اور مشرقِ وسطیٰ میں دیرپا امن و استحکام کے قیام کے لیے تعمیری کردار ادا کرتا رہے گا۔
