بیجنگ: چین نے اعلان کیا ہے کہ وہ مشرقِ وسطیٰ میں بڑھتی ہوئی کشیدگی کم کرنے کے لیے اپنا خصوصی ایلچی جلد خطے میں بھیجے گا۔چینی وزارتِ خارجہ کی ترجمان ماؤ ننگ نے جمعرات کو بیجنگ میں معمول کی پریس بریفنگ کے دوران کہا کہ چین خطے میں کشیدگی کم کرنے اور استحکام کے فروغ کے لیے تمام فریقین کے ساتھ رابطے جاری رکھے گا۔
انہوں نے کہا کہ چین مشرقِ وسطیٰ میں جاری تنازعات میں شامل تمام متعلقہ فریقوں کے ساتھ بات چیت برقرار رکھے گا، ثالثی کی کوششیں تیز کرے گا اور مشترکہ اتفاقِ رائے پیدا کرنے کی کوشش کرے گا۔ماؤ ننگ نے یہ بیان اس سوال کے جواب میں دیا جس میں امریکا اور اسرائیل کی جانب سے ایران پر کیے گئے فوجی حملوں کے بعد خطے میں بڑھتی ہوئی کشیدگی سے متعلق پوچھا گیا تھا۔
ترجمان کے مطابق چینی حکومت کے مشرقِ وسطیٰ امور کے خصوصی ایلچی ژائی جون جلد ہی خطے کا دورہ کریں گے اور صورتحال کو مزید کشیدہ ہونے سے روکنے کے لیے سفارتی کوششیں کریں گے۔انہوں نے کہا کہ چین خطے میں امن، استحکام اور مذاکرات کے ذریعے مسائل کے حل کی حمایت جاری رکھے گا۔
