اسلام آباد: پاکستان میں تعینات چینی سفیر جیانگ زائی ڈونگ نے منگل کے روز نائب وزیر اعظم اور وزیر خارجہ اسحاق ڈار سے ملاقات کی، جس میں خطے کی تازہ صورتحال پر تبادلہ خیال کیا گیا۔ اس موقع پر چین نے امریکا اور ایران کے درمیان مذاکرات میں سہولت کاری کے لیے پاکستان کی سفارتی کوششوں کی مکمل حمایت کا اظہار کیا۔ترجمان دفتر خارجہ کے مطابق چینی سفیر نے واشنگٹن اور تہران کے درمیان مکالمے کے فروغ کے لیے پاکستان کے مسلسل کردار کو سراہتے ہوئے اسے خطے میں پائیدار امن اور استحکام کے لیے انتہائی اہم قرار دیا۔
یہ پیش رفت ایسے وقت میں سامنے آئی ہے جب پاکستان امریکا اور ایران کے درمیان ممکنہ امن معاہدے کے لیے مذاکرات کے ایک اور دور کی میزبانی کی تیاری کر رہا ہے۔ یہ مذاکرات دو ہفتوں کی عارضی جنگ بندی کے بعد متوقع ہیں، جو 21 اپریل کو ختم ہو رہی ہے۔اسحاق ڈار نے اس موقع پر پاکستان اور چین کے مابین آل ویدر اسٹریٹجک کوآپریٹو پارٹنرشپ کے عزم کا اعادہ کیا اور دوطرفہ تعلقات کی مضبوطی کو اجاگر کیا۔
انہوں نے باہمی مفادات کے فروغ اور مختلف شعبوں میں تعاون بڑھانے کے لیے اعلیٰ سطحی روابط کی اہمیت پر بھی زور دیا۔قبل ازیں، اسحاق ڈار نے مصر کے وزیر خارجہ بدر عبدالعاطی سے بھی ٹیلیفونک رابطہ کیا، جس میں خطے کی بدلتی ہوئی صورتحال پر گفتگو کی گئی۔ دونوں رہنماؤں نے امن و استحکام کے لیے مکالمے اور سفارت کاری کی اہمیت پر اتفاق کیا اور جاری پیش رفت پر قریبی رابطہ برقرار رکھنے کا عزم ظاہر کی
