اقوام متحدہ میں چین کے نائب مستقل نمائندے سون لے نے 16 مارچ کو اقوام متحدہ کی جنرل اسمبلی میں "اسلاموفوبیا کے خلاف عالمی دن” کی مناسبت سے منعقدہ اعلیٰ سطح اجلاس سے خطاب کرتے ہوئے اس بات پر زور دیا کہ تمام ممالک کو اسلاموفوبیا کے خلاف "زیرو ٹالرنس” کی پالیسی اپنانی چاہیے۔انہوں نے کہا کہ انتہا پسند نظریات اور تہذیبی تصادم کے رجحانات کی سختی سے مخالفت کی جانی چاہیے، جبکہ مذہب یا عقیدے کی بنیاد پر نفرت اور عدم برداشت کو ہوا دینے والے اقدامات پر پابندی عائد ہونی چاہیے۔ اس کے ساتھ ساتھ امن کے فروغ، ہم آہنگی اور ایک جامع معاشرے کی تشکیل کو یقینی بنایا جانا ضروری ہے۔
سون لے نے واضح کیا کہ چین دہشت گردی کو کسی مخصوص ملک، قوم یا مذہب سے جوڑنے کی سختی سے مخالفت کرتا ہے۔ ان کے مطابق چین اور اسلامی ممالک کے درمیان ہمیشہ باہمی احترام اور اعتماد پر مبنی تعلقات قائم رہے ہیں، جس کے ذریعے مختلف تہذیبوں کے درمیان پرامن بقائے باہمی اور باہمی فائدے پر مبنی تعاون کی ایک مؤثر مثال قائم ہوئی ہے۔
انہوں نے مزید کہا کہ چین آئندہ بھی اسلامی ممالک کے ساتھ مل کر تہذیبی تبادلوں اور باہمی سیکھنے کے عمل کو فروغ دے گا تاکہ مشترکہ ترقی اور خوشحالی کے اہداف حاصل کیے جا سکیں.
