بیجنگ: چین کے شہر ہیفی میں اسپرنگ فیسٹیول 2026 کی تقریبات سے قبل ایک شاندار اور دلکش ڈرون لائٹ شو کا مظاہرہ کیا گیا جس نے رات کے آسمان کو رنگین روشنیوں سے جگمگا دیا۔رپورٹس کے مطابق یہ جدید اور منفرد فضائی شو دیکھ کر ہزاروں افراد مبہوت رہ گئے، جبکہ اس کی ویڈیوز سوشل میڈیا پر تیزی سے وائرل ہو گئیں۔اس تاریخی ڈسپلے میں تقریباً 20 سے 22 ہزار ڈرونز نے بیک وقت پرواز کرتے ہوئے آسمان پر مختلف شاندار اشکال اور ڈیزائن تشکیل دیے۔
تمام ڈرونز کو ایک مرکزی کمپیوٹر سسٹم کے ذریعے کنٹرول کیا گیا، جس نے جدید پروگرامنگ اور مصنوعی ذہانت کی صلاحیتوں کا عملی ثبوت پیش کیا۔منتظمین کے مطابق ایک ہی سسٹم سے اتنی بڑی تعداد میں ڈرونز کو مربوط انداز میں چلانے کا یہ مظاہرہ گنیز ورلڈ ریکارڈ بھی بن گیا، جسے فضائی ٹیکنالوجی کے میدان میں ایک اہم سنگ میل قرار دیا جا رہا ہے۔تماشائیوں نے اس شو کو ناقابلِ یقین قرار دیتے ہوئے کہا کہ ہزاروں ڈرونز کی منظم اور ہم آہنگ پرواز دیکھنا ایک ناقابلِ فراموش تجربہ تھا۔
ماہرین کے مطابق یہ پروگرام چین کی جدید ڈرون ٹیکنالوجی اور کم بلندی والی فضائی معیشت میں بڑھتی ہوئی مہارت کو واضح کرتا ہے۔یہ شاندار ڈرون شو نہ صرف اسپرنگ فیسٹیول کی رونق میں اضافہ کا باعث بنا بلکہ چین کی تکنیکی ترقی اور جدت کو بھی عالمی سطح پر نمایاں کر گیا.
