گلگت: چین سے سامان درآمد کرنے والے رجسٹرڈ تاجروں کے لیے ٹیکس چھوٹ کی فراہمی کے عمل کو آسان اور شفاف بنانے کے لیے آن لائن پورٹل کا باقاعدہ افتتاح کر دیا گیا ہے۔تفصیلات کے مطابق گلگت بلتستان میں وفاقی حکومت کی جانب سے دی گئی 4 ارب روپے کی ٹیکس چھوٹ سے فائدہ اٹھانے کے لیے اہم پیشرفت سامنے آئی ہے۔
نگران وزیراعلیٰ جسٹس (ر) یار محمد نے ٹیکس چھوٹ سرٹیفکیٹ کے اجرا کے لیے تیار کردہ اس آن لائن نظام کا افتتاح کیا۔اس پورٹل کا بنیادی مقصد چین سے سامان لانے والے رجسٹرڈ تاجروں کو شفاف طریقے سے ٹیکس چھوٹ کے سرٹیفکیٹس فراہم کرنا ہے۔ حکام کے مطابق اس نظام کو نادرا اور ایس سی او کے ڈیٹا بیس سے منسلک کیا گیا ہے تاکہ مکمل شفافیت اور ڈیجیٹل نگرانی کو یقینی بنایا جا سکے۔
افتتاحی تقریب کے دوران سیکریٹری کامرس اینڈ انڈسٹریز نے وزیراعلیٰ کو پورٹل کے طریقہ کار پر تفصیلی بریفنگ دی۔نگران وزیراعلیٰ جسٹس (ر) یار محمد نے کہا کہ حکومت میرٹ، شفافیت اور آسان رسائی کے اصولوں پر عمل پیرا ہے۔ ان کا کہنا تھا کہ اس پورٹل کے ذریعے نہ صرف تاجروں بلکہ نوجوانوں اور خواتین کو بھی تجارت کے بہتر مواقع میسر آئیں گے۔
انہوں نے متعلقہ اداروں کو ہدایت دی کہ وفاقی حکومت کی جانب سے دی گئی اس سہولت کو مؤثر انداز میں استعمال کرتے ہوئے عوام اور تاجر برادری کو زیادہ سے زیادہ فائدہ پہنچایا جائے۔
