اسلام آباد، 20 جنوری 2026: اسپیکر قومی اسمبلی سردار ایاز صادق کی قیادت میں پاکستانی پارلیمانی وفد نے بیجنگ میں نیشنل پیپلز کانگریس (NPC) کے چیئرمین ژاؤ لیجی سے ملاقات کی، جس میں پاک-چین دوستی، اسٹریٹجک شراکت داری، اور پارلیمانی روابط پر تبادلہ خیال کیا گیا۔
اسپیکر ایاز صادق نے کہا کہ پاکستان کو چین کے ساتھ اپنی بے مثال دوستی پر فخر ہے اور یہ تعلقات باہمی احترام اور اعتماد کی مضبوط بنیادوں پر استوار ہیں۔ انہوں نے مزید کہا کہ دونوں ممالک کے عوام ایک دوسرے کے ساتھ دوستی کے اٹوٹ رشتے میں بندھے ہوئے ہیں اور پارلیمانی رابطوں کو فروغ دینا دوطرفہ تعلقات اور اسٹریٹجک شراکت داری کو مزید مضبوط کرے گا۔
اسپیکر نے پاک-چین اقتصادی راہداری منصوبے کو پورے خطے کے لیے گیم چینجر قرار دیتے ہوئے کہا کہ پاک-چین اسٹریٹجک شراکت داری خطے میں پائیدار امن، ترقی اور خوشحالی کے لیے ناگزیر ہے۔ انہوں نے دونوں ممالک کے 75 سالہ پارلیمانی و سفارتی تعلقات کو دنیا کے لیے مثال قرار دیا۔
چین کے صدر شی جن پنگ کی قیادت میں چین کی تیزی سے ترقی اور ون بیلٹ ون روڈ منصوبے کے ویژن کو خطے کی ترقی و خوشحالی کے لیے کلیدی اہمیت کا حامل قرار دیا گیا۔ اسپیکر نے چیئرمین ژاؤ لیجی کی جانب سے پاکستانی وفد کے پرتپاک استقبال اور مہمان نوازی کا شکریہ ادا کیا اور انہیں پاکستان کے دورے کی دعوت دی۔
چیئرمین نیشنل پیپلز کانگریس ژاؤ لیجی نے اسپیکر ایاز صادق کے چین کے حوالے سے تاثرات کو سراہا اور پاکستان کے ساتھ دیرینہ دوستانہ تعلقات کی اہمیت پر زور دیا۔ انہوں نے پاک-چین پارلیمانی روابط کو مزید فروغ دینے کی تجویز اور خطے میں پائیدار امن کے قیام کے لیے پاکستان کے کردار کی تعریف کی۔
ملاقات میں پاکستانی وفد کے اراکین رومینہ خورشید عالم، محمد نعمان، زیب جعفر اور مولانا عبدالغفور حیدری بھی موجود تھے۔
