چینی وزارت خارجہ کے ترجمان لین جیان نے معمول کی پریس کانفرنس میں بتایا ہے کہ موجودہ کشیدہ صورتحال کے پیش نظر چین کے مشرقِ وسطیٰ امور کے خصوصی ایلچی زائی جون نے حالیہ دنوں مشرق وسطی کے متعدد ممالک کا دورہ کیا تاکہ کشیدگی میں کمی اور امن کے فروغ کی کوششوں کو آگے بڑھایا جا سکے۔ ترجمان نے کہا کہ اس وقت مشرقِ وسطیٰ میں تنازع شدت اختیار کر رہا ہے اور اس کے اثرات دیگر علاقوں تک پھیلنے کا خدشہ ہے۔
اسی تناظر میں چین نے فعال سفارتی کردار ادا کرتے ہوئے خصوصی ایلچی کو مختلف ممالک کے دورے پر بھیجا۔زائی جون نے اپنے دورے کے دوران سعودی عرب، متحدہ عرب امارات، بحرین، کویت اور مصر کے وزرائے خارجہ سے ملاقاتیں کیں۔ اس کے علاوہ انہوں نے خلیج تعاون کونسل اور عرب لیگ کے سیکرٹری جنرل سے بھی تبادلہ خیال کیا، جبکہ قطر کے وزیر مملکت برائے امور خارجہ سے ٹیلیفون پر گفتگو کی، اس دوران علاقائی صورت حال پر گہرائی سے تبادلہ خیال کیا گیا۔دورے کے دوران زائی جون نے موجودہ صورتحال پر چین کا مؤقف واضح کرتے ہوئے اس بات پر زور دیا کہ جنگ بندی اور کشیدگی میں کمی ہی بحران سے نکلنے کا بنیادی راستہ ہے۔
انہوں نے متعلقہ فریقین پر زور دیا کہ فوری طور پر فوجی کارروائیاں بند کی جائیں تاکہ صورتحال مزید بگڑنے سے روکی جا سکے۔انہوں نے مکالمے اور مذاکرات کے ذریعے مسائل کے حل اور سیاسی و سفارتی ذرائع سے تنازعات و اختلافات کو ختم کرنے کی اپیل کی۔
