بیجنگ: چینی صدر شی جن پنگ نے کہا ہے کہ چین اور یورپ ایک دوسرے کے حریف نہیں بلکہ قریبی شراکت دار ہیں۔ شنہوا کے مطابق انہوں نے یہ بات چین کے سرکاری دورے پر آئے فن لینڈ کے وزیرِ اعظم پیٹّری اورپو سے ملاقات کے دوران کہی۔صدر شی جن پنگ نے کہا کہ چین اور یورپ کے درمیان تعاون، مسابقت کے مقابلے میں کہیں زیادہ ہے اور دونوں کے مشترکہ مفادات ان کے اختلافات سے کہیں بڑھ کر ہیں۔
انہوں نے امید ظاہر کی کہ فن لینڈ، چین۔یورپ تعلقات کی صحت مند اور مستحکم ترقی کو فروغ دینے میں مثبت اور تعمیری کردار ادا کرے گا۔چینی صدر نے کہا کہ چین اور فن لینڈ کو توانائی کی منتقلی، سرکلر اکانومی، زراعت، جنگلاتی صنعتوں اور سائنسی و تکنیکی جدت جیسے شعبوں میں باہمی مفاد پر مبنی تعاون کو مزید وسعت دینی چاہیے۔ انہوں نے فن لینڈ کی کمپنیوں کا خیرمقدم کرتے ہوئے انہیں چینی منڈی میں سرمایہ کاری کی دعوت دی تاکہ وہ اپنی عالمی مسابقت کو مزید مضبوط بنا سکیں۔
صدر شی جن پنگ نے اس عزم کا اظہار بھی کیا کہ چین فن لینڈ کے ساتھ مل کر اقوامِ متحدہ کے مرکزیت پر مبنی بین الاقوامی نظام اور بین الاقوامی قانون کے تحفظ کے لیے کام کرنے کو تیار ہے اور عالمی چیلنجز کا مشترکہ طور پر مقابلہ کرے گا۔ انہوں نے کہا کہ چین فن لینڈ کے ساتھ مل کر ایک منصفانہ اور منظم کثیر قطبی دنیا کے فروغ اور ہمہ گیر فوائد پر مبنی جامع اقتصادی عالمگیریت کو آگے بڑھانے کے لیے بھی پرعزم ہے۔
